和歌山・四國之旅2017 - Day 2

2017年7月31日 （晴）

酒店 > 香梅堂 > 那智瀑布 > 撞車 > Dolphin Resort > 橋坑岩 > 酒店

昨天晚上落咗一陣大雨，好在今朝一早好好太陽！係酒店食咗早餐，就出去酒店出面條河到玩水！川湯溫泉的特點就係條河到可以浸溫泉！大家會自己掘個洞，等啲水湧出來，用啲石圍住啲泉水，然後走入去浸溫泉！又可以係出面條河游水。本來諗住比信信係河邊玩一陣水就走！點知佢玩到成身浸晒又唔捨得走！套衫出門時先換，著咗都無一個鐘就要換啦！





跟住渣車去梅香堂買叮噹燒餅，原本以為有紅豆沙，完來呢個只係雞蛋糕，無餡架！不過都好香蛋味！賞味期限得1星期，做唔到手信！買咗兩包比自己食,比錢時EE仲送咗一包迷你鈐燒比信信!

香梅堂
〒新宮市大橋通3-3-4
TEL: 0735-22-3132
營對時間: 08:00-21:00
Website: www.suzuyaki.jp/
¥325/ 20粒

本來打算去瀞峡同熊野古道,但係最後呢兩個地方都無去到!前者真係要坐船先看到,後者揹住信信,真係無力再去行山...最後放棄咗!直接就去看那智瀑布!要行樓梯落去...行第一步就腳軟,搞到個膝蓋瘀晒...如果想行上去瀑布到就要再比錢入場啦!如果唔入去,都可以係瀑布前影張相!

本來諗住搵地方食嘢但半路上我地架車比人撞！真黑仔！係日本渣咗咁多次車,都係第一次!我地架車停低咗，無啦啦bomb一聲，有架車撞咗落我地右面隻門到！我第一個反應係，我地撞親人？我地架車明明停咗....哎呀！比人撞真係無姑姑呀！好在個師機都算好人,佢報警之餘,仲幫我地打電話比險公司,又打比租車公司...又幫我地問架車可唔可以照渣! 結果搞咗個幾個鐘，叫咗警察，但係又無報案紙😑! 到最後其實都唔知點,好似咩record都無,又雞同鴨講!個警察只係留和歌山警局的地址電話比我地,唔知洗唔洗賠錢！只可以還車先算！

(還車提外話) 最後到還車時,佢地只係問我地呢件意外係點樣發生!我地打英文落部機到,再translate做日文!講完,仲比返￥340我地!應該係無租ETC但係佢地一開始收咗我地錢!跟住就走得啦!如果真係有咩事,記得要通知保險同租車公司!

求其食咗啲嘢就去Dolphin Resort!呢到有好多種同海豚接觸的活動！可以就咁影張相，餵佢食嘢，同佢地一齊玩或者同佢地一齊游水！當然每樣活動都要收費！信信仲細個，我地簡咗餵食😅3個人¥2,700其實都只係做幾個動作，前後玩完都無10分鐘！相機可以交比工作人員佢地會幫你影相！動作包括摸下海豚,叫佢轉個圈,比佢鍚一啖等...每個動作之後,工作人員會比舊魚叫你餵佢食!如果信信大啲,可以選擇同海豚一齊游水!

DOLPHIN RESORT
〒和歌山県東牟婁郡太地町森浦 703-17
TEL: 0735-59-3952
營業時間: 9:00-17:00  
Website: https://www.dolphinresort2.net/

去完dolphin resort，本來諗住直接返酒店，因為都要成2:30車程！但行咗一陣竟然經過橋杭岩，既然到咗就去影幾張相啦！有幾坐好高好大的石，但如果去過看十二門徒石，呢幾座大石相比都係小毛見大毛！不過十二門徒石你唔可以行近去看,但係呢到就可以啦!

桥杭岩
和歌山県東牟婁郡串本町橋杭
0735-62-3171 (串本町観光協会)
Website: www.town.kushimoto.wakayama.jp
駐車場：無料60台

由橋坑岩去酒店又要2.5個鐘,呢間酒店都唔平,一泊兩食！係唔錯，不過多啲香港人囉！呢間酒店有大浴場,三個私家風呂同一個混浴場！私家風呂無得book,有匙就用得！私家風呂同混浴都係室外！view來講最正係混浴！雖然話係男女混浴但係都要著一件衫遮住重要部位先入得!

晚餐可以選擇食5:30或8:00！地下有個lobby lounge每日6-7pm及10-1130pm都有snacks提供,咖啡同梅汁可自由飲用！另外係出去浸溫泉之前的休息室有免費雪條供應！

晚餐好味又精緻...食完晚餐返房自己再浸下先瞓...呢間酒店其實真係幾貴...

白浜溫泉 浜千鳥之湯 海舟
〒和歌山県西牟婁郡白浜町1698-1
Tel: 0739-82-2220

Website: http://www.hotespa.net/hotels/kaisyu/
¥102,100 (兩晚,一泊兩食/ 2大人) 和式