新西蘭之旅2018 (Day 5) 與Mt Cook無緣了

2018年3月31日

Lake Tekapo > Lake Pukaki > Mt Cook 

今日一早先係酒店煮早餐食,其實都係面包同烚蛋…我地起身食早餐時,信信都未起身!我地食到一半,聽到信信係留下叫媽媽…我就叫佢自己行上來!睇住佢個頭成個雀巢咁,真係好搞笑!煮完早餐,再準備埋個午餐就出發啦!因為今日plan去Mt Cook行山,所以準備埋個午餐拿去半路食!

由Lake Tekapo出發去Mt Cook會先經過Lake Pukaki,又係一條藍色的湖…一路上天氣其實唔錯,係Lake Pukaki仲有太陽,只不過向住目的地嗰面個天好黑,好大舊黑雲,好似好快會落大雨咁!雖然係咁,點都要去Mt Cook一轉!

 

果然,越行越黑,到咗目的地之後仲要落雨,唔係好大雨,但係有風有雨變咗好凍…由Lake Tekapo去Mt Cook要2個幾鐘,山長水遠來到落雨無得行山都唔知有咩做..只好係個Tourist Center到等,等下看下會唔會停雨!坐咗15-20分鐘,雨無停,有少少太陽係埋黑雲到出緊來…心諗,可能再等多陣會有太陽呢!於是就先返入車到食咗個lunch先…食完太陽好似真係戰勝黑雲,跟住就渣車去最近的出發地點啦!

Mt Cook有好多條Track,有長有短,短的Track15-30分鐘就行完,長的可以行3個鐘!完本諗住行Kea Point Track,來回2個鐘,去到泊好車準備出發時就開始落雨啦…真係天公不做美…廢事信信凍親,只好渣車返酒店!

走的時候經過一片大草地,就同信信係到影咗啲相!啲草真係好襯信信衫啲色,好似有保護色咁…但係真係超凍,又大風…好在信信件褸可以包埋個口…唔洗食風!

 

返到Lake Tekapo原本諗住食Kohan Japanese Restaurant,6點多去到竟然無晒位…上網都見到話呢間餐廳受歡迎,但係無諗過咁誇張!最後叫咗外賣便當同炸雞,老公就去咗Four Square到買牛扒同Pizza返酒店食!

 

Kohan Restaurant (Lake Tekapo)

Website: www.kohannz.com
〒6 Rapuwai Lane, Lake Tekapo, NewZealand
Spending: NZ40.5.-

 可能吹咗太耐風,呢晚好頭痛,食完嘢一早我就瞓咗啦!老公唔信且,再出去Church of Shepherd到一次,睇下唔影到星星,但係當然係---影唔到啦!