鹿兒島之旅2019 (總結)

8日的旅程終於完結啦，其實得8日真係唔夠！都係比較鐘意夏天的日本，雖然好大機會會打風，不過可以室外啲公園玩。開心啲！旅程總結：

1️. 天氣雖然唔係好凍，但係時陰雨，所以唔係去咗好多公園😂反而多咗去室內遊樂場，所有機動遊戲全部任玩...同爸爸對戰，勝利後露出從心底而發的笑容🤗

2️. 可能屋企無浴缸🛁信信對於浸溫泉特別興奮，最少要浸三次先得！

3️. 日本的士多啤梨園🍓真係好乾淨，唔係直接種係地下，啲泥又有嘢包住，所以啲士多啤梨唔會接觸到泥土，感覺特別良好！

4️. 餵飼綿羊🐑的一幕特別好笑，小綿羊聽到信信手上有食物，大家到追住信信，結果信信竟然跑到老遠...仲叫佢地「唔好爭嘢食」🤣🤣

5️. 越大越細膽😖以前好鐘意日本廁所，又話「日本廁所好乾淨」入到去又周圍禁啲掣！而家第一樣問「係咪自動架」（個廁所板自動升起）係既死都唔坐，要我幫佢按住塊板，仲要一路去一路望實我有無放手😒有啲食店用機械人拿位安排位置的又話好驚，混路閃😓

6️. 越大越勞氣！太開心時完全聽唔到人講嘢！試過一次係公園唔見咗爸爸媽媽，喊得好淒涼，但係轉個頭已經唔記得咗😓

7️. 話佢時，佢會「gip 」一聲，叉住條腰，檬住雙眼，問佢隻眼咩事，佢話係「Angry Eye」

8️. 而家答問㫻最鐘意加個「囉」字！係囉，鐘意囉，好囉😅

期待下次「我們仨」的旅程😍

鹿兒島之旅2019 (Day 8)

2019年2月10日

走嗰日最好天！一早去埋丸尾瀑布，呢個瀑布就係喺路邊，得4個位可以停車！瀑布前面仲要維修緊！無得入去，只係離遠影張相就走啦！

霧島呢面都係比較郊區，無咩嘢好行，就諗住早少少去機場。先去Toyota還車！全部Toll加埋¥11,060之後再坐佢架shuttle去機場！鹿兒島機場其實好細，無咩嘢行！諗住Domestic嗰面會多啲嘢行，所以Check in完就去Domestic嗰面搵嘢食！其實食店都唔係好多間，而且唔係咁好味！本來諗住買支明太子醬，點知Domestic嗰面話呢支嘢要寄倉，所以無買到，但係去返International嗰面又買到！機場其實好細，國際線入咗去都仲有一間店鋪可以行，但係當然唔大啦！明明去鹿兒島，但係機場啲手信唔係東京就係北海道！不過都有機場限定版KitKat...今次係桃味！

鹿兒島之旅2019 (Day 7) - 巧遇不知火

2019年2月9日 陰

酒店 >上天草コース > 三角西站 > 不知火道之駅午餐 > 高千穗牧場 > 酒店

Check out問酒店啲人附近有無公園，佢地就教我地去呢個上天草公園！不過太大風，信信玩緊就唔凍，我地陪玩的就好凍！玩一陣，就要開始回程啦！

途經三角西站，就諗住停一停，順便睇下有無嘢可以食，明明看blog話三角西站有嘢食，但係竟然搵唔到！本來諗住駕車返去食鰻魚飯，不過返到去都已經成點，所以係中途諗住求其搵個道之駅食，誤打誤撞竟然去咗不知火。信信又瞓咗，就抱埋入去「不知火亭」食午飯，點知入到去個人竟然叫我地入去坐和式。咁樣信信可平瞓係到，我地唔洗抱住佢食，日本人真體貼！估唔到呢間餐廳又幾有水準¥3,380！完來入面係「不知火溫泉」和式個位原本係比人地浸完溫泉後休息的地方！食完就去隔離個道之駅買買「不知火橙」不知火最出名的。好似係橙同柑的混合體，味道酸中帶甜，好似橙的texture但係又好似柑咁好易meat皮！

本來諗住早啲返酒店，不過諗住順路去埋高千穗牧場先（對上一次來到已經閂咗門）去到牧場仲有半個鐘就閂門，拿拿聲去買牛奶布甸！啲布甸有啲yogurt味，個樣仲好靚！有士多啤梨，芒果同原味！除咗牛奶布甸，仲有好多其他手信可以買！

回程路上經過見到一群羊咩咩，就比信信去餵羊！我從來都未見過啲咁活潑可愛的羊，一聽到信信手上有食物，就係咁追住信信！爸爸叫信信「摸下佢啦！」佢話「但係我好驚呀！」跟住走咗老遠，頭也不回！啲羊真係好狼，係咁撞信信個心口！呢到餵羊真係好環保，比¥200可以擰一舊食物出來，係一舊餅入面放咗啲羊的零食，成舊都食得！一個膠袋都無！

最後呢間酒店都係溫泉酒店，都有私人風呂，最開心嗰個都係信信（又浸三次）呢間真係露天風呂，澡涼已經好挑戰，再出去時真係好凍，不過跳咗入去泉水之後真係好舒服！呢間啲水真係好大陣琉黃味，好似嗅蛋味咁！晚餐啲食物雖然唔精美，但味道都唔錯，仲送¥1,000比我係酒店消費！¥39,302一泊二食包私人風呂

鹿兒島之旅2019 (Day 6) - 竜宮酒店

2019年2月8日 晴

岡田珈啡 > Parco Shopping > 浜寿司 >宇土市CityMall > オイスター八ウス牡犡王 >港長部田海床路 > 御輿來海 > 竜宮

酒店出面就有間岡田珈琲可以食早餐，不過只有烚蛋！但係佢既麵包好鬆軟，食過咁多間，最好味係呢間！咖啡呢，開頭有啲酸，但係飲飲下又無咗陣酸味！¥1,800三個早餐連咖啡

回酒店Checkout後再去隔離Parco行一陣就出發去宇土市City Mall!行咗一陣就就決定先去浜寿司食午餐先！呢間寿司店真係好抵食，大部份都係¥90(平日）門口仲要用機械人會派飛拿位，日本真係勁，連派位個人都慳返！¥2,425

食飽，再去shopping mall到行一陣，雖然唔係好大，但係有間西松屋，有個YouMe Town,西松屋隔離就有個室內兒童遊樂場，不過入場前要先比錢入會！入面有個2層高的攀高架，所有機動遊戲完全任玩！其實我比較鐘意室外的公園，可惜天氣唔太好，無法子！信信最鐘意玩桌上氣墊球，對上一次同信信玩時，佢仲係咁推個波入自己嗰面，今次終於識得推入去爸爸嗰面！入咗，望一望上面，得分！露出真心的笑容！

爸爸同信信係入面玩時，媽媽就立即去隔離購物啦！呢間西松屋仲要做緊半價，不過好多都己經無信信嗰碼！信信大咗，已經無以前買得咁瘋狂啦！行咗一陣，好快就已經三點幾，又要出發去另一個check point!

來呢到最重要就係睇日落！不過之前要先去オイスター八ウス牡犡王食燒蠔！呢到食燒蠔平好多，天草燒蠔最好味！成間餐廳得我地一枱客，個伯伯好好人，仲教我地點樣燒蠔先啱！！成日睇唔過眼過來幫我地手！原來要反轉隻蠔來燒，燒到開咗口，或者聽到pop一聲，就可以嘗試打開，再反轉燒到離殼就食得！但有時燒咗好耐都唔開口，我地以為未得，伯伯就會過來幫我地手打開！哈哈!埋單¥3,650平過之前嗰間一半，仲有service

之後就出發去港長部田海床路同御輿來海看日落啦，不過都唔係好影到個日落！

看完日落就出發去竜宮，呢間溫泉酒店係咁多間最貴嗰間，¥49,980一泊二食包埋私風呂！信信超鐘意浸溫泉，食飯前浸一次，食完飯又一次，第二日check out前再浸一次！一話浸溫泉就除晒啲衫pat晒落地，跳咗入去浴缸後係咁係到唱歌，又照頭淋啲水落個頭到！真搞笑！

鹿兒島之旅2019 (Day 5) - 超正士多啤梨園, 閒遊上下通

2019年2月7日 陰

酒店早餐>吉次園（閉園）>優峰園 > 熊本酒店check in >上下通>Tokyu Hands >五右衛門

酒店有早餐，一早就落去食早餐，個伯伯好好人，專登做個French Toast 同炒蛋比信信！

之後就出發去吉次園摘士多啤梨，呢個果園好大，一年四季都可以搞唔同的生果。冬天12-3月，正正係採摘士多啤梨的好季節！可惜去到竟然閉園，得返個販賣部，個姐姐比咗張紙我地，叫我地試下去其他果園，最後揀咗個距離吉次園最近的優峰園，雖然話係最近，題係都要駕多半個小時，好彩去到仲有得採！因為食唔到咁多，所以選擇咗只係入園摘士多啤梨，而唔唔係任食。如果一小時任飲食要¥1,700(2歲以上就要比小童價錢）

呢到個士多啤梨園感覺好乾淨，佢唔係直接種係地下，所以啲士多啤梨唔會掂到啲泥！每一粒都好乾淨。而且採摘時只要企係到就得啦！

採完士多啤梨就出發去熊本啦！去到熊本大約1點，又搵唔到餐廳食嘢，所以決定先去酒店check in先，再出去搵食，起碼唔洗諗架車泊係邊！酒店住Hotel Nikko, 地點非常方便，就係上下通隔離！一出去就有間岡田珈琲可以食早餐。唯一唔好處係泊咗要比錢，一晚¥1,500仲要人地泊咗車先同我地講免費時候由1:30-11:30,車又泊咗，最後只好比多個¥300！

午餐去咗食一風堂，雖然香港都有分店但係都係日本的拉麵好味啲！我最鐘意佢既原粒生蒜，食時先壓成蒜蓉！

食飽就去上下通行下！上下通就係酒店附近，基本上行出鬼轉個彎就到！不過唔係太多嘢行！藥房有好多間，見有時間就順便格下價！行到第二間見到龍角散只係¥600好似好平，就買咗一盒自用，反正老公有啲喉嚨痛，點知再行前多間發現¥500有找...真係低處未算低呀！

買完就去咗食我每次來都會食的朱古力牛角包！食得太多，相都無影😂

回酒店check-in拿行李上房休息一陣再出發去行Tokyu Hands. 點知去到行咗一陣周公急call,信信頂唔順瞓咗，抱住行，唔掂檔，好在係日本，最後借咗架bb車...舒服晒😅

晚餐去咗食五右衛門，之前食都幾好味，不過今次覺得都係一般而已！¥2,959

Hotel Nikko真係唔錯，開頭話無得加床，得二張單人床，但係入到房見到有三張床！不過無晒位放行李！最後都係收埋咗一張床...信信跟媽媽瞓！

鹿兒島之旅2019 (Day 4) - 鳥梄Premium Outlet Shopping日

2019年2月6日 先雨後晴

酒店 >むさし珈琲>鳥梄Premium Outlet>AEON >しげなが回転寿司 > Greenrich Hotel

酒店附近無嘢食，老公提議駕車上久留米食早餐，因為上面比較多珈琲痁！由酒店出發上去，開頭段路有點塞，上咗高速就好順暢啦！呢間coffee shop的格局都幾靚架，都有好多款早餐可以簡，杯Camel咖啡好靚樣！埋單¥1,781

之後就出發去鳥栖Premium Outlet,去咁多次outlet第一次無咩嘢買，冬天多褸買，但係香港又著唔到咁多褸，買之前又要諗下要扔邊件，加上都無手拿，所以最後都係無買！哈哈！行完去埋隔離間Aeon行咗一陣就搵食啦！本來諗住Aeon會有嘢食，點知簡唔啱，最後返去outlet附近食迴轉寿司，呢間唔平，不過都係一般，相都無影！¥2,214

Greenrich Hotel係Outlet附近，不過房唔大，仲記得上次去住，仲要搵個 car seat頂住先瞓到3個人！今次through酒店直接book,間房果然係啲，仲有張massage chair同長sofa,如果真係唔夠位，可以泊埋張sofa去床到比信信瞓！1晚¥12,000真抵住！

鹿兒島之旅2019 (Day 3) - 菊池溪谷行山,白川水源泉水清澈可口

2019年2月5日 晴

民宿 > コメダ咖啡館 >菊池溪谷 > 上色見熊野神座 > 白川水源 > 勝烈亭> Diaso > 民宿

好多早餐店都係上下通嗰面，民宿呢面無咩嘢好食，咁既廚房就真係唔想煮多餐，行去上下通要20分鐘，又未必有位泊車，最後搵咗一間係䒧菊池方向的咖啡店！コメダ珈啡店係日本都有好多間分店，係叫咖啡送早餐的，所以選擇唔多，一係烚蛋，一係蛋沙律，一係紅豆！半片多士可以加jams或牛油。¥1,120(二個早餐，追加一雙蛋同包）

食飽出發去菊池溪谷啦，泊車同入口處在有200米的距離，但溪谷的入口係唔可以泊日車，所以點都要先行200米。本來可以圍住呢到行一個圈，大約1.5小時，但回程路最後一段封咗，所以行到一半就要折返啦。可能早上落過雨，地下有啲濕，入面啲空氣應該幾好，因為我見到有好多地衣，啲青台都生到成舊石都係緣色，真係好山中好水好空氣。本來半個鐘可以行完，但係拖住信信，結果行咗成個鐘！一路上信信仲話「我地係咪行山呀」

之後再出發口去上色見熊野神座，因為時間唔夠，所以只係行咗一陣就走啦！因為順路所以去埋白川水源，呢到有個泉眼，會不斷湧啲水出來，呢到啲水好清，而且可以自由帶走。如果無帶容器可以係出面嗰間鋪頭買。我地買咗個1L容器¥100！啲水好涼好清甜！飲完之後我係到諗，其實佢話可以拿走啲水，但係無話過啲水唔洗煲就飲得！不過飲完一支，我地大家都無肚痛，啲水應該係好乾淨的😅

行晒所有景點都已經3點幾，下一站順路去草千里餐廳！可惜我地去到時，餐廳都已經關咗啦！就連下面個小cafe都關咗！最衰係，入一入去都要收我地¥410泊車費！

整來打算再去ASO farmland 但係怕時間唔夠，所以最後決定回程返酒店，沿途見到有咩食就食咩！可惜回程路上搵間7仔都無😅本來諗住可以行大路回去，仲諗住咁好既，咁少車，點知行行下先發現原來條大路已封，唔怪得咁少車啦！結果要行條迂回路回去！

不過回程路上經過西松屋同Birthday 仲有時間可以shop一陣！晚餐係勝烈亭食炸物，勝烈亭係熊本有2間分店，一間係上下通，另一間係南熊本店，我地去咗南熊本店嗰間，因為大得泊車！我對炸物本身興趣唔太，一來怕熱器，二來啲炸物通常都乾爭爭！不過呢間啲炸物一啲都唔乾，炸豬好淋，炸蠔仲好juicy，而且唔算太貴！叫咗個炸豬餐同一個雜錦set(炸蠔3隻，炸豬1件，炸蝦1隻)再追加3隻生蠔，埋單¥4,276

同一個場仲有Daiso,西松屋,Mori 藥店，食完仲可以係Daiso行一陣先返酒店！日本的¥108店真係好好行，質素唔差而且咩都有得買，行到關門先捨得走！呢啲炸物多數都係乾

鹿兒島之旅2019 (Day 2) - 古色古香嘉例川, 坪井川公園超長滑梯

2019年2月4日(晴)

優湯庵 >嘉例川 >霧島藝術之森（無開）>上村うなぎ屋 >夢大地館 >坪井川公園 >民宿

今日第一站去嘉例川，呢到係一個古舊設計車站，成個車站都係用木來做，好單調！車站入面仲有位車站大使，太朗係到坐陣！日本人做事真係認真，就連太朗都有任命證架！可能係平日，呢個車站一個人都無，彷彿就係一個已經荒廢咗的車站，說時前，那時快，聽到一陣火車靠站的聲音，原來有一列火車埋站，即刻跑去影幾張相，其實個火車叔叔，專登等埋我地影相先離開，真係好人！

本來想去霧島藝術之森，可惜去到竟然閉館😪原來逢星期一閉館！於是直接去人吉食嘢！人吉係去熊本的中點站，可以食個飯順便休息下！簡咗呢間上村うなぎ屋，佢個網頁話星期一休息，係google看又話營業到三點，反正都係上熊本的必經點，就照上去看下！

見到泊車的專位都有其他車，估計佢一定有開！落車行唔夠10步已經嗅到超看的燒鰻魚味！上村うなぎ屋係一間好舊的日本屋，一間以食鰻魚為主的餐廳。細的燒鰻魚飯有4片鰻魚，飯同鰻魚分開上，多汁¥2900！大的有6片，鰻魚放係飯上面，汁另外自己加￥4500！跟餐仲有一個湯同前菜。好香好好味，但係我自己都係比輆大鐘意食名古屋的鰻魚飯，比較薄身同香口，而且汁係另上，唔會太咸！埋單¥8,200

食飽就出發去夢大地館啦！由人吉出發要1.5小時先到！嗰到係一個市場，集合咗熊本最新鮮的蔬菜水果，都有海鮮肉類。12月正是士多啤梨當造的季節，一盒大粒裝都係￥560真係平！不過其實都係好似超級市場，唔太順路可以唔洗專登來。買咗省少食物今晚係民宿煮😊

買完餸就去坪井川公園啦！呢個公園好近熊本市，最驚喜係有一條大約2—3層樓咁高的超長滑梯，仲有幾條螺旋滑梯，大人見到都想玩呀！除咗滑梯仲有繩網，搖搖板等！呢啲先係公園嘛！公園五點就關門，想唔走都唔得呀！

呀仔開始大，住民宿會比較適合因為地方比較大，而且通常會有個小廚房！呢間民宿近熊本城，而且好乾淨，隔離已經有間藥房，Lawson，超市，可惜係，呢間民宿個廚房實在係好難煮食，佢有三件煮食用具，全部都係易潔，其中2隻已經花到無可能用來煮食，而且全部上菜用具都係發泡膠，始終用來放熱嘢都唔係咁好！另外宿住話有油提供，但係嗰款係Extra Olivia Oil,基本上只係用來做沙律，唔可以高暖煮食。不過唔要求太高整體來講都有唔錯既！

鹿兒島之旅2019 (Day 1) - 超驚險的一天

香港 > 鹿兒島 > 拿車 >牡蠣小屋匠 > 夢見が丘 > 酒店

第一次坐HK Express，真係出師不利呀，臨出門口時先發現搵唔到個「國際駕駛執照」點搵都搵唔到！仲要book咗架機場limo，結果國際駕駛執照就搵唔到，仲要比多$200等候費😭倒屎咁早起身最後都搞到好趕！慶幸的係有訂到U-First起碼check in唔洗等！第一次去T2好趕，第一次搭HK Express真係唔知原來唔可以帶嘢食上機，咁又係既，張機票咁平！從未試過坐架咁細既機去日本！整體經驗還算ok，坐位都唔算太窄（坐第二行）因為坐第二行，所以好快落到機，又好快過到關！

落咗車去Information Center到同佢講我地係Toyota book咗架車！之後行出去出面等shuttle bus. 唔止Toyota，仲有好多出租車都會係呢到pickup.

落咗機，收到工人短訊話已經搵到個證！因為我地無正本「國際駕駛執照」所以租唔到車，好彩老公同佢同事同機，佢地又肯幫我地租架車，架車一早係樂天book左，租8日¥42,390連ETC同car seat！頭幾日我地無牌駕駛><！另一面就叫家人幫忙DHL個國際行車證去酒店，最後終於收到！安安心心駕車啦！

成功拿咗車就出去去牡蠣小屋匠食燒蠔啦！¥7,456食完消耗本來諗住去牧場，但係行錯左路去咗一個coffee Cafe竟然見到有一個室內兒童遊樂場。仲有send相最鍾意玩嘅班衫，喺嗰度玩左九個字，就番酒店啦。

酒店揀咗油塘諗，唔呢度主要都係食豬，所以晚餐都係日本呀，不過間房就有個私人風裏，可以比相信沖涼嘅時候順便玩下水。¥37,100 (1泊2食包私人風呂)

差唔多瞓嘅時候相信又開始扭計啦，話係咪玩去完日本就返香港又要返屋企。