2019年4月23日 （晴）
酒店早餐 > 沙灘，泳池 > SIX ON SIX Cafe > 會安 > Madam Khnah > 坐船
- 划椰子船 > 河邊漫步 > Morning Glory Restaurant > Cocobox > shuttle 回Pullman
今日早咗起身諗住早少少去沙灘無咁曬...雖然一早無正午咁曬，但玩得耐都辛苦！信信越大越細膽，以前細個捉實佢，佢就推開你！比個水泡佢又唔要！而家攬實咗個水泡捉實佢都話驚！一個浪冚埋來仲要喊！
玩完就係酒店附近食！照舊想Grab架車，可能太近，等咗好耐都無人接單！於是直接係酒店門外坐taxi，坐幾分鐘就下車啦！呢間6/6 cafe的位置有啲隱蔽，周邊都係民居！好似留上係住，留下做生意咁！食物選擇唔多，主要都係包類小食，另外有各種咖啡，果汁等！叫咗杯椰子咖啡，沙律同個wrap!杯椰子咖啡係把椰子同奶打成冰再加入咖啡中！好似人地啲雪糕咖啡咁，不過佢係椰子sorbet. 真係好好味！
之後回酒店坐shuttle去會安啦！酒店Shuttle VND320K（2大1細）大約45分鐘車程！2:15pm由酒店出發，9:15pm由會安回酒店！去到首先去試下Madam Khanh的越 法包VND95,000連2杯果汁，計返港紙$7個包，真係抵到爛！好好味！
食完就周圍行下，點知行行下，有人sell我地坐椰子船，開價VND600K最後講價到VND400K其實好㧪錢，坐一隻船出去15分鐘左右，再轉另一隻「椰子船」流到呢。坐原仲要比人屈tips開頭比VND10K佢話要多啲，心怕佢唔把船划返去，唯有比多VND10K就係咁玩完，好流，好搵笨！
上岸無耐，信信瞳瞓咗，雖然有拿揹帶，但係都好難行，加上每個位都超多人，想話搵個位影下相都有難度，老公話都唔知睇咩，好似去咗旺角咁。最後影咗啲燈籠同日本橋，就去搵嘢食啦！
呢到有必食三寶，去咗間叫Morning Glory的餐廳，叫咗白玫瑰，炸雲吞同高樓面！味道呢，一般啦！但係間餐廳好焗又熱，本來想坐到8點，但係食晒嘢好快比人收晒啲嘢（趕客）唯有埋單囉（VND325K)
走時，信信已經醒咗，仲話肚餓，望下毎鐘，7點多，唯有去找另間鋪頭坐啦！去咗間Coco Box係飲Juice的，什麼冷壓果汁...老實講，果汁唔覺有咩咁特別，不過有張sofa可以坐到8:45pm，叫咗個三文治比信信，叫完信信話自己好肚餓，唔等得啦！毎包來到，好快好正經咁食咗一半！可能真係肚餓啦！坐坐下發現地下有隻超大隻的甲由，拿拿聲拿起地下個。由Cocobox行返去落車地點只係10分鐘！shuttle大約9點左右就到咗啦，得4個人坐，未夠9點就開車，9:30多就已經回到酒店啦！
上到房發現佢未執房，留下一封全韓文信，心中無名火起，就打去Room Service問同叫佢立即叫人來執房。呢間酒店好搞笑，要插住門咭，門口先見到打掃嗰盞燈，出門時，如果拿走咗張門咭，盞燈就會熄咗！有時你出門時話明DND（因為唔想鎖luggage先出去)但返到房又會發現間房有人入過來。廢事煩，之後嗰幾日，出門時都無拿走門咭啦！
沒有留言:
張貼留言