Day 648 - 爸爸暑假的最後一天

Day 637 - 識得企係到wiwi啦

見佢成日話企係到wiwi,就專登買個尿兜比佢試下企係到WIWI...信信好快就學識啦,仲成日話要去搵青蛙...不過成日未疴晒,就行出來,滴緊幾滴落地!但都算佢自己識去架啦!到出街啲廁所真係好污糟,希望佢可以企係到去啦!

 

Day 637 - 起身! 自己落床

通常信信瞓醒咗都會叫我地...今日,信信未醒,我同爸爸就係廳到睇電視!睇睇下,聽到房入面有土聲,無耐,信信就自己行咗出來搵我地啦...啲頭髮仲要豎起晒...

 

Day 633 - 破鎖 - 捐入櫃桶

屋企啲安全鎖一啲都唔安全啦!信信已經識得自己開鎖...摷晒啲嘢出來,自己再捐入去,仲要閂埋門...玩完叫佢執返好,佢又放返晒啲嘢入去,自己扣返個安全鎖!啲人仲讚佢有手尾...咁我地要個鎖來做咩呢?

 

和歌山・四國之旅2017 (總結・後記)

去過大阪N次,都係第去和歌山同四國,本來打算去北海道,但由於機票太貴,最後只可以去多次大阪..雖然帶住信信去旅行好辛苦,好多人都會話,佢自己都唔記得去過啦,帶佢去做咩...但係我地相信可能佢唔記得咗自己去過大阪,什至唔記得自己去過日本,但係係旅程中學過的嘢,信信係會記得既!佢唔會記得自己幾時去過動物園,但係會記得長頸鹿...

意外篇
(1) 去到日本第二日,架車就比人撞咗!仲要雞同鴨講!好彩撞我地嗰個人好...又幫我地報警,又幫我地打去保險公司同租車公司...好彩到最後都無咩事!
(2) 旅程去到一半,老公唔見咗個眼鏡...搵唔返!帶住信信去旅行,真係好多嘢拿,有時記得拿佢啲嘢又唔記得咗自己啲嘢....

和歌山・四國之旅2017 - Day 14

2017年8月12日 (晴)

終於來到旅程的最後一日啦...開心的時間真係過得特別快...其實今日一啲目的都無,都係諗住係酒店附近行下,看下仲有無手信買!諗住都係坐BUS去機場,因為door to door,好似方便啲!票係要即日買架,但無分時間既...只要買咗票,到時上車就得架啦!車票就係酒店前少少個巴士站到買,大人一個￥1,200

今日唔知做咩嘢,一起身就已經超頭痛啦...去到買車票嗰到仲想嘔TIM...最後老公話係阿倍野嗰到有間massage做特價,叫我去比人按下,看下會唔會好啲...咁大個都係第一次係日本按摩JA!￥2,700按完,無咁緊,無再想嘔啦...本來想食搵食,但係今日係星期六,周圍都好多人,啲人11點幾就已經排隊等位食飯啦...結果搞完一餐,咩都食唔到...

和歌山・四國之旅2017 - Day 13

2017年8月11日 (晴)

去到trip的尾聲,都係覺得買得唔係好夠皮...係天王寺附近啲MALL又無咩好買,最後決定坐train去臨海Rinku Oulet到再shop過!上次住係outlet又覺得呢個outlet無咩嘢買,今次可能買得唔夠,又覺得好似又有嘢買咁!呢到間BEAMS都有平嘢買,不過男裝啲短褲,平均都要￥6,900先有交易,老公話貴,最後咩都無買!以前來日本,必看的GAP,今次一樣都無買,其實GAP都無咩款,係平...

和歌山・四國之旅2017 - Day 12

2017年8月10日（晴）

Comfort Café > 還車 > 回天王寺附近shopping

早餐好味，再encore多一次Comfort Café！之後就去郵局寄件！酒店附近行5分鐘就有一間！酒店正門出，轉右面，路口轉右，落樓梯再直行就到！好方便！寄咗個car seat同一堆唔等洗的衫，20kg多啲，加埋¥7,050. 

Day 627 - 扮爸爸去wiwi

係日本食食下飯,信信拿起自己件衫,對住牆學爸爸wiwi....隔咗一陣,另轉面話「疴完!,爸爸疴wiwi」

和歌山・四國之旅2017 - Day 11

2017年8月9日 （晴）

Comfort Café > 神戶臨海樂園

神戶車站有間Comfort Cafe，入面的早餐真係好好味！西口二番街！呢間唔係好多分店,既然來到梗係食呢間啦!仲記得上次來的時後係冬天,信信著住件羽絨,來到呢到食早餐時佢都未醒,比爸爸媽媽可以好寧靜咁食咗個早餐...今次....信信拿晒人地啲糖出來玩....><

Day 625 - 要求高高的信信

今日沖咗支奶比信信,座凍坐少少,諗住唔緊要啦,照比佢食!點知,信信一飲話「好凍」咁凍未加返啲熱水比佢囉,點知佢又話「無味」都唔知佢係咪真既...

 

Day 625 - 沖完廁所讚自己叻仔

信信真係好鐘意日本啲廁所,成日都話「日本廁所好乾淨」今日,信信去完POPO,自己沖廁,跟住好得意咁行出來話「叻仔,好叻仔!」自己讚自己,比佢激死!

 

和歌山・四國之旅2017 - Day 10

2017年8月8日 (晴)

咖啡館 > 茂實果園 > 神戶動物園

拿車附近有間咖啡館,雖然大家都係咖啡館,不過同昨日嗰間有少少唔同！今次呢間平過昨日嗰間,但係呢間得炒蛋!昨日嗰間係叫咖啡,加錢食早餐!今次呢個係就咁叫早餐!見佢又開咗，所以就入去試下! 

消費: ¥960

和歌山・四國之旅2017 - Day 9

2017年8月7日 (大雨)

咖啡館 > Ario n outlet shopping > 崗山大和酒店 > 麵王拉面

原本打算今日去摘白桃,但係個風剛剛殺到來,超大風大雨,所以最後只係喺Ario Mall同Outlet行足一日,室內動最安全!Ario Mall入面有間咖啡館,一早就開,所以就去嗰到食早餐!一人要order一杯咖啡,可以特價買一個早餐...叫咗一杯普通咖啡,一杯炭燒咖啡試下!其實普通咖啡,味道已經唔錯,不過飲完杯炭燒咖啡之後,杯普通咖啡變酸...呢個早餐貴咗少少,但係都幾好味!

Day 624 - 自己洗手..自己噤製...

日本啲廁所真係好體貼,同一格有大人去的正常廁所,有比小朋友坐住等媽媽的位,有比大少少的小朋友企喺到換片既板,有比BB換片的板,仲有尿兜...仲要有比小朋友用的手盥!就算係公廁都有比小朋友用的輔助廁板...信信真係好鐘意日本廁所,入到去一定會話自己噤製,自己洗手...希望去完呢個trip你會識得自己去廁所!!!

 

和歌山・四國之旅2017 - Day 8

2017年8月6曰 (晴)

早餐 >  おもちゃ王國 > ARIO MALL

本來想去komeda食早餐，去拿車時先發現老公唔見咗個眼鏡，返返去酒店看下有無漏低但無發現！原全唔知自己幾時漏低咗！搞咗一朝,最後去到餐廳都成10點幾，可能係星期日，超多人等位！眼見有好張枱但係就無人帶位,等咗差唔多成個鐘,到入得時已經1055分啦！由食早餐變咗食午餐。

和歌山・四國之旅2017 - Day 7

2017年8月5日 （雨）

UCC > 四萬十 > 青蜒公園 > Pia Spido

早餐係UCC café plaza食!其實都唔係咁鐘意係日本既UCC食早餐,因為多數都係得隻拾蛋,但係點都好過之前嗰間三文治!點知原來呢間UCC Café Plaza係有煎蛋食架!不過禁煙席就係得門口嗰兩個位!好彩我地夠早,有位坐!不過呢間啲service真係一般!

和歌山・四國之旅2017 - Day 6

2017年8月4日

酒店 > 青島 > 下灘車站 > 松山市行 > 蟹道樂

一早就出發去青島，由酒店過去都要差不多3個鐘車程！本來諗住唔太趕，但係酒店出去條路，又係嗰啲九曲十三彎的單線雙程車！去到松山都12點幾！先去AEON到買少少嘢食，再出發去貓島！由松山市出發要一個鐘先到！去到目的地，好似好荒蕪咁，都唔知邊個位上船！搵咗一陣，終於搵到！點知...竟然係滿席！真係好失望呀！山長水遠來到呢到但係咩都無得看！

和歌山・四國之旅2017 - Day 5

2017年8月3日 （晴）

德島行下 > 西松屋 > AEON mall > 大步危 > 祖谷溫泉和之宿

一早先係酒的附近找早餐食，好多鋪頭都未開，最後搵到間dotur 食咗個三文治同咖啡，外觀就一啲都唔吸引但係味道都ok啦！係日本搵早餐食真係好難,有時好多間都無咁早開! 

本來諗住去粟林公園行，但廢事咁走馬花，最後係返德島車站附近行下！徳島駅有個クレメントプラザ4樓有Toyuu Hand，木來想去買個袋但入面太細無咩行，返而隔壁有間Can⭐️Do既10蚊店又幾好行！以前成日想搵啲有耳仔的spoon終於係呢到搵到啦！仲要made in japan可惜信信大咗唔洗用呢啲spoon啦！之後我一見到有呢間10蚊店都會入去看下,可惜都搵唔到嗰隻SPOON,係得德島嗰間先有,真巴閉! 

和歌山・四國之旅2017 - Day 4

2017年8月2日

酒店 > 丸三 > 坐船 > YouMeTown Pia Sapido

第二日的早餐跟第一天差不多，我個人比較鐘意日式早餐，欣賞佢多數係魚同菜！西式早餐多數係腸，煙肉，火腿同蛋....感覺健康啲同無咁飽!

和歌山・四國之旅2017 - Day 3

2017年8月1日 （晴）

三段壁 > 洞窟 > tore tore market > 浸溫泉 > 沙灘

第一天的早餐以個盒咁上，賣相一流，滿足晒視覺的享受！

食完之後就去咗三段壁，無咩特別，影張相就走啦！同一個地方可以比錢入去看洞窟，好似張保仔洞！要搭lift 下去地下，大約有30層樓咁低，落到去會見到啲海水沖入個洞到，老實講無咩特別，又唔夠震撼，又唔夠大！不過如果唔入來，好似真係影兩張相就走咁！不過啲水沖上來的時候,信信看到好緊張,好開心,咁都好,抵返!

Day 618 - 第一次去沙灘

信信第一次去沙灘,之前已經Brief咗佢話啲沙會有少少咭腳,仲諗住佢會唔鐘意,結果又OKAY呀!信信仲係咁拉我出去個海到,一個浪冚埋來,仲諗住佢會驚咗,點知完全唔怕!啲浪一沖埋來,信信仲要專登坐低,等啲浪沖佢落去!

一個浪沖走晒信信啲玩具,啲姐姐仲一個個幫佢執返...信信又行埋去啲姐姐到話「姐姐...沙沙呀!」當然無姐姐明佢講咩啦!但係就氹到人地好開心,仲比晒啲機會個老豆明正言順咁影啲靚女相...真係過份!