名古屋之旅2016 - Day8

Hilton Nagoya -大須商店街> 大勝軒拉面> コメダ珈琲

來到2016年最後一日,我地去咗大須商店街行下,其實由伏見站行過去都唔係好遠!去程我地係坐TRAIN,架TRAIN等咗成10分鐘先到呀!所以回程時,我地決定行返來!大須站有個觀音寺,今日晚上應該會好熱鬧,不過帶住呀仔,我地晚上都無再出去啦!來到大須,又點可以唔行下個二手店商場,不過其實裡面新舊嘢都有得買,要看清楚呀!地下嗰層係賣相機,鏡頭嘢,再上有手錶,手袋,男女裝等!林林總總,咩都有!有passport仲有得退稅架!老公最後買咗一隻二手的ball watch x BMW!比起出面平一半到啦,但係講緊係萬幾蚊…雖然係二手,但係無花無爛,講咗話買錶咁耐,終於買到心頭好啦!

名古屋之旅2016 - Day7

Hilton Nagoya -えびせんべいの里 > Return Car

今日我地會去蝦餅工廠,聽個名都覺得卡世啦!呢到真係一個工廠,入面大部份的蝦餅,都有得任意試食!無錯係任意試,任意食!食幾多都得!入到去見到一個個大盒,裝住好多唔同味道的蝦餅!個盒仲要係自動開,自動關!食到你唔食呀!講返味道呢,真係咩都有!原味,醬油味,蕃茄味,咖哩味,梅味,WASABI味,檸檬味,蔥味,蒜味,朱古力味,真係多到食咗咩味都唔記得啦!不過其實蝦味唔太重,不過唔貴!一大包無獨立包裝的蝦餅大約¥540.-可能有啲無得試既會多啲蝦味怪?可以任食真係令人太興奮啦!其實機場都有得賣,仲要係一樣價錢,所以如果唔夠時間,可以唔洗山長水遠入來工廠囉!

名古屋之旅2016 - Day6

Hilton Nagoya - Toki Premium Outlet 

今日最主要的活動就係行outlet,同約咗另一group舊日本同事食飯小聚一下!Premium Outlet基本上每次去日本都會行!不過其實帶住呀仔,跟本無可能每一間店都入去看,我地都只係簡咗幾間想行既鋪,分頭行事!最慘呢,Premium Outlet係無一個又大又安全既地方比呀仔放電,如果放佢落地就要看實佢!10點到6點都好似唔係好夠行咁!記得要先去Tourist Information Center到拿本折扣卷先呀!再平啲架!

Toki Premium Outlet

〒1-2, Tokigaoka,Toki-Shi, Gifu, Japan

TEL: 0572-53-3160

Website: http://www.premiumoutlets.co.jp/

名古屋之旅2016 - Day5

蝴蝶蘭-伊勢神宮-托福橫丁-一升燒肉-birthday-AKACHAN-Hilton Nagoya

食完早餐CHECKOUT就出發去伊勢神宮,由蝴蝶蘭去伊勢神宮大約45分車程，簡咗條快路，先要上山再落山，開頭仲以為自己行錯路！可能如果唔行呢條路就要兜個大圈,所以呢個叫快路啦!其實我地都已經好早去到伊勢神宮,但係最近嗰個停車場已經FULL咗,要排隊入去!最後我地泊咗一個較遠的停車場,最大收費¥200!一路行入到神宫,真係好凍!可能咩都無,又大風,不停係到食風,凍到呢!最後都未行到最入就已經折返咗啦!

行返出去,有一條街有好多嘢看,叫托福橫丁!入面有好多名物,其中一樣一定一定一定要食既呢就係赤福!其實只係一樣好簡單既嘢,就係一舊糯米,上面有啲紅豆蓉!味道好夾又唔漏,而且啲紅豆蓉仲係好soft¥210有2粒,本來諗住食1份,最後太好味,叫多咗個!買完之後,佢會比個number你,之後會有人拿住出來叫number,到時你舉手佢就會拿到你面前!係托福橫丁有2間赤福,有一間係本店!不過要即場食先好食，同禮盒裝啲味唔同架！

除咗呢個好味糯米滋外,仲有好多間都賣燒飛彈牛,既然今次無機會上高山,就係呢到試下啦啦(¥500) 天熱實在係太凍啦,見到有間賣松格板牛肉包(¥350),熱騰騰的,好味!呀仔都係咁叫包包…哈哈!有一間賣鴨油炸包(¥180)的…千萬唔好食,真係食到成口油! 其實有太陽,只係因為大風,所以覺得凍!快快行完呢條托福橫丁就駕車去食下午啦!

名古屋之旅2016 - Day4

鍋田川-伊勢NICOPA-黑潮燒蠔-蝴蝶蘭

食過早餐，就先去伊勢AEON店搵個playroom同呀仔放電先！NICOPA係AEON店入面，係要收費的兒童樂園，可惜並唔大，一眼看晒！入場費¥600包一大一細，加多個大人比¥100!呀仔一見到個波波池就已經自己沖咗入去玩，最鐘意係掟晒啲波出來，我地汁！另外一面有個吹氣滑梯，不過信信唔識玩，抱咗佢入去，佢向後行返出來😂仲有一個迷你保齡球，信信已經識得自己拿個波出來人，然後掟出去！大約玩咗一個鐘到就走啦卜，要食lunch再趕去下一站！lunch就係AEON入面食埋，求其間咗一間食天井！走時見到出面有我最鐘意的creep!仲有一款係得朱古力醬¥200抵呀！不過我加咗個雪糕，好好味呀！點解人地嗰啲可以做到咁脆身，香港AEON都有一間食creep但好難食囉！仲要個creep一定會次住張紙，又唔脆！

名古屋之旅2016 - Day3

12月26日 （陰）

紅鮎-Jazz Outlet-長島 鍋田川

係酒店食過早餐先出發! 呢到既早餐好以啲日式便當咁,不過味道一般,唔係佢唔好,只係我個人唔鐘意食熟的三文魚啫!

今日最主要係去MITSUI OUTLET PARK JAZZ DREAM,其實名古屋主要有兩個outlet,另一個係premium outlet!之所以想去三井outlet最主要係因為呢到有Aigle呢個牌子,老公想買Aigle的羽絨,上次去九洲三井outlet時因係夏天,所以好少冬天褸,就算有,又無碼,老公一口氣買咗兩年外套!呢到有另一個比premium outlet好的地方就係佢有playroom比小朋友玩,咁樣我地就可以分開血拼的同時又可以比呀仔有一個放電的空間啦!

MITSUI OUTLET PARK JAZZ DREAM

〒三重県桑名市長島町浦安368

TEL: 0594-45-8700

Website: http://www.31op.com/

個outlet係長島一個dream park入面,如果駕車入去,要比¥1,000.-停車場費!長島本身係一個SPA LAND,不過入面所有酒店都FULL晒,如果唔係就可以直接係入面住,近好多!呢到仲有一個小朋友的景點,就係面包超人館,不過我地實在係無時間,所以最後skip咗無去啦!

Nagoya Anpanman Children's Museum & Park

〒三重県桑名市長島町浦安108-4

TEL: 0594-45-8877

Website: http://www.nagoya-anpanman.jp

今晚酒店係鍋田川,唯一唔係太方便的地方就係無浴室! 可能佢有大浴場，所以房間本身無浴室！但廁所洗手盤係獨立既，除咗沖涼先行出去之外，刷牙洗面去廁所都可以係房！講起沖涼就有啲呢hea啦！因為我要帶埋呀仔去大浴場，入到浴場要先除衫放入locker，再出去澡涼！我一路搞掂自己，又要夾住呀仔，一放係地佢就走咗去！到澡涼，我又要先搞好自己同佢澡，佢就一面撩隔離個婆婆，要知道個處境真係好監介，下次要爸爸同佢澡先得啦！

因為住宿雙對地平，晚餐我地簡咗個較豐富的菜單！來到真係覺得好開心，有魚，蟹，伊勢龍蝦，和牛，鮑魚，雞！真係咩都有！隻鮑魚超新鮮，仲郁架！和牛入口即溶！價錢比昨日嗰間平¥20,000但嘢食超好味呀！至於呀仔呢，我地就係我地食既嘢到簡啲佢食得既比佢，好似菜同雞肉都係用湯烚熟，豆腐之類！食飯的地點係出面，一間房有2席，好在隔離嗰席係我地差不多食完先來，唔係呀仔周圍走就搞到其他人！

日本的早餐多數都無咩驚喜，來來去去都係一啲積物，再加豆腐，總會有一條魚，點解又係我最討厭的三文魚架！

雖然無浴室但呢間酒店的確唔錯，值得推介！

季の邸　鍋田川

〒498-0821 桑名郡木曽岬町新加路戸30

TEL: 0567-65-0007

Website: http://www.nabetagawa.co.jp/

二泊一宿: ¥36,100