大阪玩雪之旅2019 - Day 10

2019年12月31日 晴 – Day 10

London Bakery Cafe > 永樂ゆめの森公園 > Rinku Outlet > まめ寅 > 還車 > 機場

早餐去車站附近的London Bakery Café食,簡單早餐,多士烚蛋咖啡!味道一般,不過好實惠,只係¥814,係昨日早餐的一半呀!原本諗住去Outlet但係見無咩嘢要買,就同信信去一陣公園放電!見到呢個永樂ゆめの森公園,有個超大的石梯...呢個公園就係墓地隔離,掃完墓小朋友可以去隔離個公園玩,又可以野餐,諗落都幾貼心!呢個公園好大,下面有個彈彈床,石梯的上面仲有個滑梯!可惜昨天落雨,條石梯無開...大人見到好想玩!爸爸同信信去完洗手間,出來信信望住人地啲碑話,爸爸呢個迷宮來架?點解無人係到玩既?童言無忌!

玩完就去Outlet行一陣,諗住去行下AIGLE,可惜外套無我個碼!一件都買唔到!最後買咗一件特價羽絨比老豆¥10,000!隔離Sketch鞋好平,結果買多咗2對,其中一款仲要係同第一日嗰對一樣既,圍起都係四百幾蚊有2對,真係好抵!午餐又去咗まめ寅到食,我地好鬼悶,都係食返嗰三個餐!

1:40左右就趕住走啦,仲要去入油還車!呢頭附近真係好塞車,由Outlet行返出去油站都用咗半個鐘!重點係原本想入油嗰間油站去到竟然無開...結果要搵過第二間!還車係Domestic機場嗰面,又要行返去International機場離境,好在我地係U-First,所以唔洗點等就check in咗!怕太趕,所以無行就直接入去啦!不過過咗關後係無土產店架!得啲手信同零食買!行完比信信玩一陣,又要趕住去個廁所同拿啲水...搞掂啲人都差唔多入晒閘啦!回程好趕...上到飛機真係好累!比信信食咗少少杯面,同睇咗一陣電視佢就瞓到落機啦...