大阪玩雪之旅2019 - Day 6

2019年12月27日 雨 - Day 6

酒店 > Paris Cafe > 雨晴 > 新湊きときと市場 > APITA > Birthday > 湯樂里 

今日去咗一間Paris Cafe的餐廳食早餐，店鋪好細，仲播緊啲古典音樂！餐牌全日文...叫咗個焗多士配半生熟蛋芝士腸仔，味道都唔錯，可惜佢加咗啲泰式酸甜汁，有少少唔夾！咖啡雖然淡，但唔酸，都好味！埋單¥1900

食飽就去雨晴站看連山！呢到的天氣真係同個地方名一樣，又雨又晴！想睇連山的先決條件係一定要好天！好天之餘，仲要萬里無雲！就係怕天氣唔好，所以留2天，結果都係無緣！去到雨晴，雖然已經停咗雨但係好多雲，完全見唔到雪山個頂！影咗幾張相就走啦！希望下次有機會再來！

雨晴站附近有個魚市場，一間三角屋上面有好大隻蟹！入面唔係好多，主要都係賣松葉蟹，可以即場烚來食，一隻中size蟹大約¥3000就食到啦！除此以外，仲有富山県出名的白蝦！最衰太遲先食早餐，來到一啲都唔餓，叫咗個白蝦天婦羅3個人食！我地食蝦，信信食晒啲飯😁下次再來一定要空肚去！

去完市場就去APITA行一陣，有間comma ca,買咗少少嘢就再去Birthday shopping. 雖然已經無咩嘢要係birthday到買，但總覺得啲時間唔多夠洗，行一陣又諢口要趕去下一站啦手！

由birthday去酒店要成個鐘！明明唔太夜，但個天黑到好似已經8點咁！去到酒店先checkin後，就立即去澡涼浸浴先食晚飯啦！呢間酒店除咗招待住客外，只來浸浴不留宿都可以！唔怪得出面咁多車！入面有好多個溫泉，其中一個41度的好啱信信玩、而且咁啱無人！有啲可以瞓起到浸的，但太熱！信信玩唔到！遠見有個35-38度的溫泉，諗住呢個仲啱，點知信信話太凍！浸咗一陣就趕回房因為預約咗7點食飯！呢間溫泉酒店book咗食越前蟹,雖然係鮮甜啲,但係無比較下,其實同上次的紅蟹一樣好味!上次嗰間好自助式,反而食得自在!成日都怕食得太慢,阻住人!埋單¥57900