北海道之旅2018 (Day 10) - 快閃積丹半島

2018年8月12日 (多雲)
小樽 > 可否茶館 > 積丹 > 神威岬 > 新南樽市場 > COOP > 自家煮

今日一早本來打算去珈琲館食早餐,先把車泊係小樽車站,雖然係收費停車場但唔太貴…(最後比咗\100)…入到去先發現間珈琲館今日同明日都唔開,有無咁好彩呀!之後就去咗車站入面有間可否茶館到食三文治…

 可否茶館 \1,290

食完早茶,喺車站到買咗2個包比信信路上如果肚餓可以食!由小樽去積丹大約一個鐘頭車程,原來諗住好近…但係可能星期日,呢條路真係好塞呀!揸下又停下,一路望住前面諗等咩呢?明明綠燈,但係啲車又唔行既?係咪有交通意外呀?幾乎每一個燈位都停一停…我地呢條路行咗2個幾鐘...

12點咗右,終於到咗積丹!呢到出名係海膽…專程來呢到都係想食佢地海膽飯…簡咗一間鱗晃荘うろこ,點知去到佢話今日唔做生意…有無咁黑仔呀!正諗住一係去咗神威岬先時,見到有另一間食海膽飯的鋪頭-うに膳屋,就走咗入去啦!其實我覺得間間啲味應該都差唔多,海膽飯又唔洗煮,只要新鮮就得!積丹海膽的顏色比一般海膽深…我地叫咗個MIX海膽飯,右面係積丹海膽,左面係其他地方的海膽,深色的海膽係鮮甜啲,一碗成五千幾円架!

うに膳屋 \12,450

 跟住就去神威岬啦!呢到好似係沿山路行出去咁,如果天氣唔好或者好大風都唔開放架!好耐之前呢到係女人禁地,進入之前會見到一個女人禁制之地的牌…我同信信行咗一半就返轉頭,行到去神威岬要20-30分鐘,我地怕信信一陣摟計唔肯行,成條路要抱佢行就大獲啦!所以老公同公公行到尾,我行到一半就同信信回頭返去草地到玩bubble…呢到好大風,玩bubble最啱,一舉手就玩到,都唔洗用口吹…草地上仲見到有蒲公英…不過信信唔識吹!

大約2:15pm就開始回去,回程路上係路邊見到啲直賣店,老豆買咗2個\500蜜瓜,一箱6個有柄的蜜瓜都係2千幾円!桃\550有三個!回程路一樣係咁塞,其實唔係塞燈位呀!來回積丹町條路都係沿海架,有好多沙灘石灘…有好多人都係海邊或者係路邊到扎營,所以呢條路有咁多車同埋咁塞…

回程又用咗2個幾鐘,去到新南樽市場好多鋪頭都已閂晒啦…得返啲冰無晒啲嘢啦…本來諗住來買啲新鮮海鮮返酒店煮,如意算盤打唔响啦!最後只可以去COOP買嘢返酒店煮!

買咗牛,刺身蝦,菜,拉面,韭菜,蜆,蟹柳…煮咗個海鮮雜錦鍋…可惜唔夠鹽,有蝦味唔夠咸味…牛呢唔夠肥,之前嗰舊好味啲!生果有路邊買的桃同蜜瓜…\500都好多汁又甜,係唔靚仔囉,如果自食,無所謂啦!