北海道之旅2018 (Day 9) - 瘋狂購物日

2018年8月11日(多雲,雨)
UCC coffee > MOP shopping > Rera Shopping > Airport pick up Father > 小樽

呢間酒店的好處就係近UCC,一早起身先去UCC食早餐再出發去Outlet Shopping!UCC的早餐真係好好味,杯咖啡都好飲!

 

UCC \1,140

因為時間有限,所以要快恨準咁買!第一個目標係AIGLE…明明係夏天,唔知點解可以買到褸…仲要買2件!

AIGLE - \39,000.- (一件羽絨一件防水簿褸,老公買咗啲褲)
AMARI  \8,800.- (牛仔褲)
Mitsumine \13,000 (T shirt,背心羽絨)
Beams \16,940 (老公短褲,自己衫)
たら吉 \1,620 (三隻碗)

本來見到New Balance有對情侶鞋好靚,老公又無著勿,話試唔真,結果無買到!Lunch係Outlet入面的鐮倉食,不過無包,但係有pizza!都一樣好味!

到3:45pm就諗住去機場接老豆機啦!點知上車去機場website看下班機land咗未先發現delay咗成個鐘…決定去埋機場嗰間outlet (RERA)到快望下!見到有Jack Wolf Skin…又係另一個好平好平的牌子…我之前係德國買嗰件褸,呢到都唔洗HKD1,000.-不過無買,只係看咗先!反而啲男裝無咩款簡!小朋友褸都好平…另外仲有Bouncing Castle玩…話消費満\5,000可以免費玩一次…唔係就\300玩5分鐘!信信見到兩眼發光,可惜都係唔玩得住!

快行完見到老豆架機land咗就出發去機場啦!本來諗住唔泊車,我去接老豆,但係老公又唔知邊到可以停,最後都係泊咗入停車場,頭半個鐘免費,之後就要收錢!等咗15分鐘,就見到老豆傻下傻下咁行出來啦!好在平安到步…無蕩失路,唔係都唔知邊到搵返佢呀!

接到老豆,拿拿聲去拿車,準時30分鐘走人,唔洗錢!之後就直接去小樽啦!由機場去小樽要個半鐘…公公架機又delay入到小樽,真係天都黑齊啦!

 簡咗間民宿住…自己Check in,出發前會比定個密碼你,到咗就入去住!好搞笑!來咗日本咁多次都係第一次住呢啲民宿!呢間民宿都唔錯,入屋有條走廊,走廊位有廁所同一間睡房(沒有窗)之後有對門,開門係大廰,開放式廚房,2張sofa同一張床!床嗰面可以關門…老豆一入來就簡咗走廊間房,咁我地瞓覺關咗大門,好似有2個空間咁!不過相上次嗰間,呢個廚房的配套就無咁好啦,無自動洗碗機,個焗爐好細,又無飯煲!整體都乾淨既…地點方面又近小樽運河,行去都係8鐘左右!唯一唔好呢,就係酒店位置太高,行出去要經過啲斜路先到…來來回回都有啲吃力!

Hostel Canal View

〒北海道小樽市東雲町20-6
HK$3,844.- (一間屋連廚房)

到咗酒店先放下行季就出去搵嘢食啦!因為已經好夜,行到落山腳見到一間日本家庭料理店就入咗去啦!叫咗2個魚生飯1個海鮮煱,一個燒魚同炸魷魚!個魷魚最好味!

小樽たけ寿司　\6,492.-

 回酒店前先去lawson行下就返去酒店休息啦!