北海道之旅2018 (Day 2) - 名水公園

2018年8月4日 （陰）
登別溫泉街 > 福庵 >名水公園 > 阿武茶

今日早餐安排咗7:45am係房到食,所以7:15am就要起身,比人地執床準備早餐,食完早餐仲要等信信起身食早餐,出得門口都已經九點幾!先去登別溫泉街到行一陣,但係啲鋪頭10點幾先開,同埋多數都係買手信嘅鋪頭!10:50am到就返去酒店攞車再去福庵食蕎麥面!叫咗個天婦羅熱蕎麥面,雖然啲天婦羅加埋落啲面到,啲粉漿淋咗又幾好味喎!

蕎麥處 福庵

熱天婦羅蕎麥面(2碗)  \1,900円

食完就揸車去名水公園,呢到最出名就係呢度啲泉水係可以直接飲用,有好多人都會自己攞住個水樽去拿啲泉水!泉水冇咩特別嘅味,不過就好冰凍!一入名水公園,就會見到一個兒童遊樂場.好似好大但係又唔係好多嘢玩,不過信信都可以喺度玩左成個鐘!

Fukidashi名水公園
〒北海道虻田郡京極町字川西

離開公園之後,就出發去酒店啦!好彩都有比信信玩一陣,因為臨走嘅時候開始落雨啦!由名水公園返酒店大概20分鐘左右,今次我哋住呢間shiki niseko係一間Service Apartment,好新淨,咩都有齊晒,所有煮食用具,就連保鮮紙,電飯煲都有!仲有兩間睡房同兩個廁所,真係超級正! 二世古的冬天比較多人,因為好多人都會來呢到滑雪,夏天相對係淡季,所以酒店都平啲!呢間Service Apartment二晚HKD2,929,可以住到2家人!

晚餐就係一間阿武茶餐廳度食,叫咗個燒蟹,燒魚,燒雞翼,一個三文魚湯飯同餃子,埋單6,100円!

 

阿武茶 \6,100円