(2Y) 話咁快就2歲生日啦

信信最終意吹蠟燭～

(23M)完美示範 - 自己開燈拿玩具

自己推凳仔入房,開燈,上床拿玩具,落床,熄燈,推返張凳仔出廰,泊好...好似好有手尾咁!

 

Day 697 - 自己入網床

Day 674 - 第一次食芝麻糊

比信信食芝麻糊,點知佢嫌污糟...洗唔洗喊到咁呀!

 

Day 666 - 不知不覺,原來已經認得啲圖形啦!

之前認來認去,都認唔到啲圖形!原來不知不覺已經識晒...仲要教返爸爸轉頭,話要轉下先入到...真係搞笑!

 

Day 663 - 百厭星玩紙巾

成日都炆啲紙巾DUMP入垃圾桶玩...今次仲要炆咗一大堆..話佢做咩咁百厭,佢就話 「一張」一疊喎呀仔!

Day 662 - 與媽媽一起慶生

生日就梗係要去海洋公園啦!一路上信信話去 「海岸公園...」信信仲未要比錢入場...想同信信玩旋轉馬,比佢睇人地玩咗幾次先比佢上去,但係上去,佢就話「出返去...」好在未係大喊!可惜個海洋劇場無開,同埋近住Halloween...好似好多嘢都唔見咗咁!都無同信信坐cable car去對面,廢事信信上到去驚,唔知點算!最後無咩點玩都已經4點幾,等爸爸來接我地再去食飯...希望下年再來佢會識得玩...

Day 648 - 爸爸暑假的最後一天

Day 637 - 識得企係到wiwi啦

見佢成日話企係到wiwi,就專登買個尿兜比佢試下企係到WIWI...信信好快就學識啦,仲成日話要去搵青蛙...不過成日未疴晒,就行出來,滴緊幾滴落地!但都算佢自己識去架啦!到出街啲廁所真係好污糟,希望佢可以企係到去啦!

 

Day 637 - 起身! 自己落床

通常信信瞓醒咗都會叫我地...今日,信信未醒,我同爸爸就係廳到睇電視!睇睇下,聽到房入面有土聲,無耐,信信就自己行咗出來搵我地啦...啲頭髮仲要豎起晒...

 

Day 633 - 破鎖 - 捐入櫃桶

屋企啲安全鎖一啲都唔安全啦!信信已經識得自己開鎖...摷晒啲嘢出來,自己再捐入去,仲要閂埋門...玩完叫佢執返好,佢又放返晒啲嘢入去,自己扣返個安全鎖!啲人仲讚佢有手尾...咁我地要個鎖來做咩呢?

 

Day 627 - 扮爸爸去wiwi

係日本食食下飯,信信拿起自己件衫,對住牆學爸爸wiwi....隔咗一陣,另轉面話「疴完!,爸爸疴wiwi」

Day 625 - 要求高高的信信

今日沖咗支奶比信信,座凍坐少少,諗住唔緊要啦,照比佢食!點知,信信一飲話「好凍」咁凍未加返啲熱水比佢囉,點知佢又話「無味」都唔知佢係咪真既...

 

Day 625 - 沖完廁所讚自己叻仔

信信真係好鐘意日本啲廁所,成日都話「日本廁所好乾淨」今日,信信去完POPO,自己沖廁,跟住好得意咁行出來話「叻仔,好叻仔!」自己讚自己,比佢激死!

 

Day 624 - 自己洗手..自己噤製...

日本啲廁所真係好體貼,同一格有大人去的正常廁所,有比小朋友坐住等媽媽的位,有比大少少的小朋友企喺到換片既板,有比BB換片的板,仲有尿兜...仲要有比小朋友用的手盥!就算係公廁都有比小朋友用的輔助廁板...信信真係好鐘意日本廁所,入到去一定會話自己噤製,自己洗手...希望去完呢個trip你會識得自己去廁所!!!

 

Day 618 - 第一次去沙灘

信信第一次去沙灘,之前已經Brief咗佢話啲沙會有少少咭腳,仲諗住佢會唔鐘意,結果又OKAY呀!信信仲係咁拉我出去個海到,一個浪冚埋來,仲諗住佢會驚咗,點知完全唔怕!啲浪一沖埋來,信信仲要專登坐低,等啲浪沖佢落去!

一個浪沖走晒信信啲玩具,啲姐姐仲一個個幫佢執返...信信又行埋去啲姐姐到話「姐姐...沙沙呀!」當然無姐姐明佢講咩啦!但係就氹到人地好開心,仲比晒啲機會個老豆明正言順咁影啲靚女相...真係過份!

 

Day 600 - 自己整凍支奶

爸爸話工人姐姐就來放大假,媽媽又要返工,信信要自己照顧自己,等爸爸可以休息下...第一步,自己整凍支奶,第二步,自己沖奶,第三步....

爸爸：＂得未呀!＂
信信：＂差不多＂
爸爸：＂凍未呀!＂
信信：(放支奶係面到)＂未凍!呀...等一陣,差不多＂

講得有文有路好似真係識咁,其實只係想玩水囉!

 

Day 599 - 嗲豬豬...冚到Pat Pat

信信百厭冚到個PATPAT,喊住咁同媽咪講...
信信：＂媽咪,冚到呀!＂
媽媽：＂咁點呀!＂
信信：＂呵返dou＂
媽媽：＂好啦,來呵返啦!呵....得未呀?＂
信信：＂鍚返＂
媽媽：＂鍚返個pat pat呀＂
信信：＂係呀!＂
媽媽：＂好啦,鍚返....唔POP＂

信信即時開心返!呢個仔嗲到呢....係咪男仔來架!

 

Day 596 - 食藍莓都MEAT皮

爸爸媽媽食嘢都唔係好fuzzy,點解隻仔食嘢咁姿整呢?比粒藍莓佢食,佢吐返出來話＂MEAT皮皮＂藍莓點MEAT皮呀!不過可能因為咁,佢食到啲硬嘢,都會識得吐返出來唔食...就算係一啖飯入面有少少硬,佢都可以淨係吐返啲硬嘢出來...

 

Day 593 - 藍精靈,十分勁

媽媽今日放假,同信信食完早餐就係商場玩一陣!經過一間CD鋪有個藍精靈POSTER,我就同信信講＂信信,呢個未係藍精靈囉＂點知信信回我一句＂十分勁＂有時真係唔知佢到底識幾多嘢!無諗過佢會咁樣答我...真係唔捨得你大得咁快