名古屋市內遊
正常我地唔會係日本過新年,因為新年通常只放一天,我地多數12月31日就會回家!不過今年多咗一日假,所以1月1 日都可以留係日本,不過名古屋的新年真係好靜,靜到有個位我地係到諗,咁啲人到底去晒邊呢?我地由酒店行去大須,全程靜悄悄的,成條街好似得我地三個咁!一路行到接近大須,先開始有啲人氣!正諗緊午餐食咩時,好似無餐廳有開咁,最後去咗間GASUDO到食,好似香港既SAIZERIYA咁.
ガスト(Breakfast)
〒愛知県名古屋市中区栄３丁目７−９新鏡栄ビルＢ１
TEL: 052-238-2569
無諗過新年所有嘢都唔開,福袋唔係1月1 日開始有得買咩?點解所有大百貨公司-近鐵,Takashimaya,AEON全部都無開!最後返咗去酒店個lounge到high tea,真係好好彩,無自我down grade唔係去邊打發時間好!雖然酒店晚上都有cocktail.食cocktail都飽,但係呀仔都要食架,於是我地又行去名古屋方向看下有咩嘢食,最後發現車站餐廳有開,是但簡咗一間有白飯的餐廳是但食咗啲就走啦!估唔到原來日本的新年原來係咁樣過咗!
名古屋的福袋係1月2日先開始發售架!一大清早兩個主要大百貨公司已經有經多人係到排隊入場,我地是但搵咗條隊來排, 排排下發現我地要行後門,心諗唔係真係咁多人呀!一直由地下行到上10樓,沿路行下又停下,最後發現原來呢條隊係排抽奘囉!最後我地係後門入返商場,有啲福袋已經賣晒啦!福袋的精髓在於你可能會以一個好平的價錢買一堆唔知自己會唔會鐘意既衫!未到比完錢返酒店之前你都唔知自己買咗啲咩!基本上所有牌子都有福袋,穩陣起見都係買啲自己識的牌子好啲,最後買咗As known as de base (¥10,000), Triumph (¥5,000) , Levi(¥10,000)!最驚喜係Triumph有14件嘢係入面,無bra的!雖然唔係件件啱,但係加埋應該唔止¥5,000.
As kown As 呢就真係大件嘢多,有一件長身褸,兩件冷衫,一條長褲,一件外套,兩條長裙,仲大一件T-shirt!只係件大外褸已經要¥24,000,如果你件褸啱著咁未抵晒囉!至於LEVI呢係買比我老豆既,有一件厚褸,2件T-shirt!
總括買福袋的經驗係…係outlet買好啲,無咁迫!買一件¥5,000的嘢但係排隊比錢可能要等30分鐘!係outlet買一來無咁多人,二來可以簡一啲自己真係鐘意既嘢!又有得試上身!或者你同幾個朋友仔一齊來買,然後交換都得!感覺買福袋好似幫佢清貨咁,但係間唔中都有啲驚喜既!
另外,好多人都話日本的激安之殿堂好平,事實係一啲都唔平囉!我地格過好多嘢,都發現其實係藥房買仲抵,加上佢做得好雜,好似咩都有得賣咁,所以又迫又多人,啲嘢又亂!所以唔洗特別去買😅
沒有留言:
張貼留言