和歌山・四國之旅2017 - Day 4

2017年8月2日

酒店 > 丸三 > 坐船 > YouMeTown Pia Sapido

第二日的早餐跟第一天差不多，我個人比較鐘意日式早餐，欣賞佢多數係魚同菜！西式早餐多數係腸，煙肉，火腿同蛋....感覺健康啲同無咁飽!

 食完早餐就準備去碼頭坐船去德島啦！由酒店過去碼頭都要2個幾鐘架!去到先食個lunch先再去碼頭!有間丸三中華拉面好好出名,就去試下啦!間鋪唔大,好彩早一步入去,唔係就無卡位坐啦!有啲手卷同雞蛋係枱到,可以自己拿來食,唔係免費架,埋單時要話比佢聽你食咗幾多架!都幾好味呀,係咸咗少少!

丸三中華そば(中華拉面)
〒和歌山県和歌山市塩屋6-2-88
TEL: 073-444-1971
營業時間: 11:00-22:-00
定休日:星期日及公眾假期

去到和歌山港，先泊好架車，再去買票！買票時要先填張form,寫低架車的長度同同乘人等！車長一般3-4米，收費¥7,600包師機費用！再多一個成日收費¥2,000!我咁大個都係第一次同架車一齊坐船！船期唔係好密，早上10點幾一班之後要等到1.40先再有船啦！泊車嗰到轉右,兜個圈就見到隻船,基本上都係跟住大隊入...

揸架車上船後,先跟工作人員的指示泊好架車，之後佢地會用一舊磚放係個車TYRE位到固定好架車,防止佢倒後！上船後自己找位坐！酒店房有分和式同洋式，無想過坐船都有和洋式！和式畳畳米，細路見到最開心，除咗鞋，跑下跑....又可以玩一餐！信信當然唔例外，捉都捉唔住呀！瞓咗又可以直接放佢係地下，唔洗抱住瞓！船開咗,就唔可以落返架車到拿嘢架啦,貼身物品一定要記住拿呀!船程大約2個鐘到,到咗步上車，一出就走得，都幾方便！不過路費就真係唔平啦!

南海フェリー株式会社(和歌山港)
〒和歌山県和歌山市湊2835番1
TEL：073-422-2156
¥7,600(3-4米車包師機費用),大人每個收費¥2,000

先去酒店check in，今次住車站附近的大和酒店！簡佢並唔係因為近車站，而係呢間酒店相對地大同有特大床！同埋信信一齊，選擇酒店都真係要有啲要求！最好都係和式，地方大可以比信信走來走去！其次就係張床起碼要160cm，唔係唔夠三個人瞓！

呢間大和酒店唔太貴，新，乾淨，房入面仲有張按摩椅！留下有間7仔，check in lobby係3//F！check完in 佢會比張咭你再去部機到自己比錢！全自動化！泊車方面可以泊佢隔離個停車場¥1,000一日，可泊到第二朝11點！多次出入都無問題！

德島站前大和ROYNET酒店 (Daiwa Roynet Hotel Tokushima Ekimae)
〒徳島県徳島市寺島本町東3丁目8番地
Tel: 088-611-8455 
Website: http://www.daiwaroynet.jp/zh-cn/tokushimaekimae/
消費: ¥11,800 (1晚)
房間SIZE: 23平米/168cm

晚餐去咗YouMe Town，本來只係想去Birthday，但超塞車，去到都成6.30，無理由行返轉頭再搵嘢食，於是係附近搵食！YouMe Town入面有間食面包放題的餐廳，啲面包好鬆軟，好好味！叫一個set已經包咗面包放題，最重要係唔貴！一個兒童餐，一個焗意粉，一個粟湯加個薯條都係¥580，埋單食咗¥3,283

Pia Sapido
〒徳島県板野郡藍住町奥野字東中須88-1　ゆめタウン徳島　1F
TEL.088-677-9168
¥3,283