廣島大阪之旅2019 - Day 8 (晴)

2019年7月25日 (晴) - Day 8
酒店早餐 > 天橋立viewland > 錦市場 > 跳烏龜 > AEON Mall


每朝食早餐都係抱住落去...通常食到一半佢就醒啦!同晚餐一樣,都係食少少就飽!早餐一般,晚餐吸引好多!

食飽就出發去天橋立Viewland啦!由油屋出發大約50分鐘車程!先坐纜車上山,再係山上眺望景色!本來諗住呢到有得玩又有得食,可以停一停,食埋嘢先走!結果,景色只係一般,而且所有玩既嘢都要比錢,呢到好細,得好少嘢玩!最後無食嘢就走啦!

由天橋立返京都大約1小時50分鐘!來到錦市場已經四點,呢到無免費泊車,兜咗幾個圈,泊咗架車就入去行個圈!雖然話錦市場係京都人既廚房,但係呢到好多遊客!唔覺有咩平嘢買!如果買咗嘢食,要企定定食完先好行呀!唔好一路行一路食!行咗一陣見到有間食刨冰好似好好味,就入去試下啦!相就一流啦,不過價錢同味道都就…埋單￥1,760

本來諗住去跳烏龜,其實係一條河,有啲石可以由一面跳到去另一面,不過搵咗好耐都搵唔到!到搵到之後,玩咗都無一陣,落雨…有無咁黑仔呀!拿拿聲走人係橋底避雨…得一把雨傘仲要行返去停車場!激死人!好在有拿雨衣比信信…如果天氣好應該都幾好玩…可惜!

落雨無地方好去,就駕車去AEON到行,順便食埋晚餐先走啦!見到有MUJI就入去行啦,信信就係個兒童區到玩!其實都無大個都唔知點解仲鐘意係嗰到玩!晚餐見到有一間食牛扒同面包的餐廳就入咗去食啦!味道都OK架,不過唔記得影門口,間餐廳名應該叫BANQUET!